如果你老竇係陳振聰……

文:朱里安

李澤楷在楊受成手上幫梁洛施贖身,梁洛施就幫佢生咗個仔叫李長治。「李家長實治香江」呢件事本身,已經講明含住鑽石鎖匙出世有幾爆。不過,即使你老竇生意失敗窮過燶丁,都唔緊要!假如佢有陳振聰咁上進,你一樣可以轉運!

雖然一出世就俾人改名做「Wealthee」,譯做中文等如叫「旺財」,實在有啲樣衰,但當全港五十萬個仔讀緊普通中學嗰陣,你就同霍英東、趙世曾後人齊齊讀緊每年承惠十二萬嘅國際學校喎,放洋留學一條龍指日可待,乜鬼三三四教改副學士銜接完全唔關你事。燒銀紙,真係可以擋好多災。

燒銀紙係咪風水,以至你老竇到底識唔識風水,都唔重要,重要嘅係佢識咗個孖辮婆婆——或者應該叫「孖辮姐姐」,因為據聞你阿媽竟然係佢「契媽」——孖辮婆婆成日俾錢你老竇駛,你兩歲嗰陣屋企就有棟四千幾萬嘅半山豪宅,到今年你十七歲,老竇袋袋埋埋起碼有幾十億。如果冇個咁嘅老竇,你幾年後走去參加大學生四千蚊實習……OK唔係四千俾夠你八千好未?呢個數,你閑閑地要做一兩萬年先至賺到。

你老竇咁上進,當然唔會慢慢等運到,孖辮婆婆一死,佢就請大狀打官司想拎走千幾億遺產。橫掂之前積落咁多本,絕對豪得起打佢三五七年官司,大不了賣下飛機賣下樓,法律面前永無含忍,唔似得早排有個菲傭Mildred Perez告老闆非禮,一拖兩年就淪落到要執垃圾。政府仲要好聽話,四年前已經取消遺產稅,你老竇分到嘅錢一毫子都唔駛交出去。

好多人笑你老竇做鴨服侍孖辮婆婆,真相係點你唔敢講,但即使賣身俾孖辮婆婆其實都唔係咁差,至少唔會無啦啦命都冇。有個同你差唔多年紀嘅女仔王嘉梅,屋企單親又落嚟香港冇耐,冇錢讀書走去做援交幫補家計,點知遇著個客索K索大咗,慘遭奪命碎屍。更陰功嘅係,人地心肝脾肺腎俾人挖埋出嚟沖落廁所,報紙俾到嘅關注都唔夠一個禮拜;你老竇好地地身光頸靚,報紙報足佢兩年。

當然報紙唔止報你老竇,仲會報孖辮婆婆。荃灣嗰座你老竇改名、孖辮婆婆出錢起嘅如心廣場,兩年前有幾百個紮鐵工人響佢出面罷工,抗議十年來份糧有減冇加。有位工人嘅阿媽擔心個仔無飯開,一時睇唔開自殺。咁啱孖辮婆婆佢又係兩年前過身。兩位都係婆婆,點解一個係傳媒焦點,另一個根本無人理呢?

如果我地老竇唔係陳振聰,亦唔太想陳振聰做我地老竇,老老實實,佢分到龔如心幾多身家關我地餐蛋治咩。同人唔同命,教育對津校學生同國際學校學生唔一樣,企業對打工仔同大股東唔一樣,法律對菲傭同有錢人唔一樣,呢啲大家都有眼見,之但係報館豪擲幾千萬紙錢油墨錢全城熱播爭產連續劇嗰陣,證明連傳媒都唔當我地係一回事。

咁,報紙究竟睇嚟為乜?

標籤: ,

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s


%d 位部落客按了讚: