Archive for the ‘八子睇真D’ Category

絕代商驕.鯰魚之謎

15 十月, 2009

文:八子

人人都話電影係一個夢工場,八子都覺得架,畢竟每日做朝九晚六得已經好攰啦,唔睇下戲煲下劇發下夢點頂呀!不過,煲劇緊係好過睇戲啦,至少唔駛比幾十蚊呀嘛。雖然八子同好多朋友都一樣好窮,金融風暴後俾人理所當然地減人工,真係要勒住褲頭過日子架!不過八子都算好彩,未窮到連電視都無得睇,最多食少D當減肥囉,起碼可以同其他人發埋同一場夢呀嘛!最近大家齊齊夢見黑武士變白武士,無賴都可以變武士,奸得黎又有良心,又要有頭腦,一次過滿足咁多個慾望,出奇過KINDER出奇蛋呀!

人人都以為自已係條鯰魚
到底我講緊咩?上個月八子追緊《現代奸人堅》,睇得開心之餘仲令人大開眼界,其中有一個好新鮮嘅名詞──「鯰魚效應」,麥提爽都話呢個係管理資源嘅重大問題,原理係點?話說以前挪威人捕魚時,為左令沙丁魚新鮮D,會放一條食沙丁魚嘅鯰魚係沙丁魚群裏面,令沙丁魚有危機意識,博命游就唔會死得咁快啦!鯰魚咁偉大喎,緊係要由主角麥提爽充當啦,所以佢表面上係一個出茅招攞著數,疴尿都隔過渣﹐聰明但係又刻薄得過份嘅無賴,但事實上佢嘅內心係一個就算自己窮到燶都要幫人嘅一個好人。人地大集團請佢收樓,佢仲要自己做醜人做無間道,暗地裏教街坊對抗收購;又幫一班無業遊民開回收公司,仲要自己做埋犯眾憎嘅假想敵,為左令大家奮發圖強,不惜自我犧牲,偉大到連八子都睇到眼濕濕呀!畢竟係香港要揾個有良心嘅人都唔容易呀嘛。

「刻薄」還是「偉大」?
套劇講到鯰魚咁偉大喎,八子都諗緊係咪應該學下做鯰魚,不過八子諗諗下,都應該唔駛跟麥提爽學嘅,香港人個個都覺得自己係嗰條鯰魚,所以人人都話香港人出名躁底,周街都係白鴿眼嘅港女,D老細個個狗眼看人低,八子都唔係無聽過D姐妹比老細鬧到眼紅紅,聲都唔敢出一句,拿錯一件衫俾客仔,分分鐘被人鬧足半日外加投訴。
以前我都唔明點解一個人可以當人地唔係人咁蝦法,到八子睇《現代奸人堅》嘅時候,謎底終於都解開啦!如果佢地唔係天性刻薄,可能係因為佢地都誤以為自己係一條鯰魚,幻想當沙丁魚嘅自尊賤過地底泥嘅話,就可以激發佢地嘅奮鬥心。不過,到底係「刻薄」定係「偉大」都係買大細,睇下最後開咩啫。其實,通常鯰魚都會引致兩種後果,一係無死得咁快,一係死快d。咁如果條鯰魚卒之迫死左人囉,咁咪應該算係「刻薄」囉;但係如果真係成功左,咁咪就算係「偉大」囉!最老套嘅劇情都有得賣啦:女人分手時盡講刻薄說話,激勵到個男人最後發奮圖強名成利就,到果陣個女人又會變左係「用心良苦」架啦…

鯰魚係邊個放落嚟的呢?
當然,做得鯰魚嘅都要夠奸,要識得玩遊戲,先至可以鎮得住D沙丁魚啦!一方面又要確保自己唔駛蝕底;另一方面心情好時咪好似麥提爽咁,飲下紅酒食下芝士又過兩招比D沙丁魚囉﹐幾梳乎呀!唔夠奸做唔成鯰魚嘅人,最多幻想自己係一條沙丁魚,遇著一條好心嘅鯰魚,咪可以打救自己囉,好似呀爽哥咁,人地夠聰明,又係武士嘅高層,所以只要佢肯幫你走走法津罅,勝過你自己游十年呀!
不過,八子嘅媽媽成日都教八子,害人之心不可有,防人之心不可無,「不要問只要信」呢D野八子應該唔會做啦。更何況,大家不要忘記:鯰魚都係由捕魚人放落去嘅,佢追沙丁魚令D沙丁魚可以唔駛咁快死,都係為左D捕魚人謀利!
八子有時諗,點解大家咁鍾意無賴?可能都係因為老老實實生活唔到啫,我地小市民唔夠奸所以成日都比人蝦,故此發夢都要揾一個「其實係好人」嘅奸人堅黎頂住囉!不過,等人黎救,真係同買圍骰食天糊無咩分別,分分鐘比人殺個片甲不留。畢竟,八子做左咁多年人,都真係無見過披著狼皮嘅羊囉。

人生到底有幾多個十年?

2 十月, 2009

文:八子

話說三色台上個月嘅《巾幗梟雄》真係大出風頭,金句一籮籮,演員又紅到發紫,連網上重温區都比觀眾迫爆。風頭咁勁,八子哽係要湊湊熱鬧,睇下佢到底有咩法寶!

自《溏心風暴》以後,爭產之後又爭產, 每晚睇住D媽媽級嘅演員你摑我摑你,淚流成河,都替佢地同自己辛苦。雖然《巾幗梟雄》都要繼續流住淚爭產,不過就多了一對巾幗梟雄囉。估唔到《秀才愛上兵》嘅大老爺今次唔做智者反而擔正做左流氓英雄,訪問一個跟著一個,勁就勁在人地夠「雷」呀嘛!帶住D工人反完又反,先鼓勵被剋扣工資嘅工人罷工,之後為左攞返D大米,唔理自身安危隻身殺入沙家寨,仲鼓勵班窮賊反抗將佢地搾乾搾淨嘅奸人彭鏗,反完一轉又一轉,真係仲勁過識七十二變嘅孫悟空呀!

不過,就咁比D工人「以下犯上」,哽係唔得啦!正所謂香港嘅發展全賴投資者嘅支持,如果大老闆都只不過係魚翅漱口,工人竟然想做牙有雞食,中秋佳節想有假放噃,仲要求「加人工」添… … 咁D老闆咪唔可以安安樂樂坐在D工人頭上嘆世界?更唔可以話炒人就炒人啦!無得做無良僱主喎,簡直完全影響香港嘅形象、投資者嘅信心呀!如果劇集暢銷海外,外商都唔敢來投資,咁點得呢﹗唔怪之得阿祥哥都要係慶功宴高唱我係三色人,又將飯局主 人捧到上天,飯局主人雙鞋都俾佢擦到蠟蠟令。計我話,巾幗梟雄實在係缺一不可啦!無四奶奶撐腰,柴九哥都只不過係個有食無薪嘅底層員工、市井無賴,表面對住老闆嘻嘻哈哈,暗地就詛咒佢地絶子絶孫,點敢口響響叫班兄弟反完又反呀?當然,柴九呢個角色總唔能夠太聰明、太正直,因為唔貪心、有頭腦嘅草根總係得人驚嘅,佢唔豬番少少嘅話,老闆又點能夠冤柱工人貪心?

正如孫悟空都要有個如來佛嘅五指山鎮壓住,霸王洗頭水嘅成大哥都講到明,「唔管就會亂」,所以總要有個正義嘅老闆娘主持公道嘛﹗唔係得四奶奶幫佢地出頭,所有員工都會因為罷工而被炒魷啦!做主子嘅,一定要對員工好,不過都要教導佢地咩可以要,咩唔可以要;最緊要係,主子俾嘅先可以伸手接,唔俾嘅話當然唔可以搶,咁先至係一隻乖的狗仔!

無錯!「人生有多少個十年呢?」人一世物一世,做牛做馬都仲要睇人面色,先至可以活得有樽鹽,咁唔值錢,真係無陰公囉!仲要你肯睇人面色,都唔一定有好下場,連拍呢套劇嘅三色台都係勁賺十五億之下炒人啦,仲炒完一鑊又一鑊,而家成個將軍澳都「囉」爆左。唉!都唔知被炒嘅員工又有幾多個十年可以重頭再捱過,堂堂大台又唔知有幾多百個員工可以俾佢炒呢?